عقب ما اخذت زينب القوطي
مريم : انتين ولاخير وياش القوطي فتر وانتين ما شربتينه ؟
زينب : الحين بشربه
مريم : اذا ما تبينه جيبيه
زينب : لا هذاني ببطله
شربت زينب القوطي تالي صار فاضي ما فيه شي
مريم : جيبي برميه
زينب : لا خليه
مريم : يووو لويش ؟
زينب : باخشه
مريم : تخشين الخمايم عندش ؟
زينب : ليييييي؟ جي اني زباله ؟
مريم : عجل تقولين بتخشين القوطي
زينب : اي باخشه كيفي
مريم : ما اقول الا الله يعينش على روحش
زينب : انزين انتين ويش اشتريتين لش من السوبر ماركت ؟
مريم : حلاوه و اجباس وعلووج وكل شي
زينب : ايي مو اني بس جبسين
مريم : منش اقول لش اشتري لش قلتين بس خلااص
زينب في قلبها : ويش اسويي كل من محمدوو دهدهني
الجده : هذا ويش عندكم من گوت اعطونا
مريم : تبين اجباس ؟
الجده : ها
مريم : هاش اخذي بستوووگ على تمر
الجده : ايي هذا مره احبه جيبيه
الام: هاكو جايبين قدر بلاليط تحت قوموا اخذو ليكم
الجده : صدق ,, الحمد لله خيرات خيرات
وهم قاعدين ينجبون للناس الي في الحمله ويقومون جهال يتهاوشون ويفلعون بعض بالنعله
تدرون ويش صار ؟
,,,
,,,
,,,
طاح النعال في القدر
زينب : وييييييييييع اماه هكو طاح نعال في قدر البلاليط
مريم : ويش طيح هل النعال في القدر ؟
الابو : كل من هل الجهال
واحد من الباص : خلاص احنا ويش نسوي فيه ارموه
وحده من الجهال :وع اني ما باكل منه
وحده من الامهات تقول الى ولدها : تعال حبيبي لا تاكل منه
والحاله قايمه
ما شافوا الا الجده قابله
الجده : لا ترمونه ,, الله بحاسبكم يوم القايمه نعمة الله ترمونها تدرون ان سبايا الحسين ضلوا بلا گوت الى اكفر من شهر وانتون الحين تبون ترمونه جيبوه
اني باكله اهووو اذا رميتونه بيخسف بكم ربكم
زينب : شوف هذي الي بتجيب ليي عله
مريم : جدتي طاح فيه نعال حالته حاله
الجده : ماعليه هو نعمة الله اكلوه
وحده من الباص : ويييي لا لا لو ويش يصير ما اخلي ولدي ياكل منه
الجده : عجل طاح حظكم كلكم ,, وكلكم بقطكم الله في نار جهنم
مريم :
المهم سكتوا عن السالفه عطوا الجده بلاليط في صحن وسكتوها والباقي ما احد اشتهاه ورموه
راعي الباص : الحين عباره انتون بتظلون بجوعكم
الابو : الحين انت واصل والساعه ثلاث وقف في محطه عشان نتغذى هناك
محمد : في غذا الساعه ثلاث ؟
الابو : اي لا عاادي
قام الباص يواصل السير
الام : تقريبا باقي جم ساعه ونوصل سوريا ؟
زينب : يمكن باقي 6 او 7 ساعات
الام : يا علي باقي واجد
زينب : صبرتين يوم كامل ما تقدرين تصبرين 6 ساعات ؟
الام : اي والله
ما ادرات زينب الا محمد داير من كرسيه يطالع فيها
زينب في قلبها : بل هذا من متى للحين يطالع فيي واني اتكلم واني ما ادري
محمد :
دارت زينب لانها مستحيه تطالع محمد وسوت روحهاا تتكلم وي مريم
الا مريم نايمه وتفشلت زياده
زينب : يا علي ويش هل الفشيله
محمد :
تابع الباص المشي لين ما وصلوا الاردن الساعه 3 و نص
راعي الباص : يلا قوموا يا جماعه عشان يختمون الجوازات ومره وحده تتغذون في هل المطعم
نزلوا الي في الباص كلهم وختموا ليهم الجوازات و خلصوا الاجراءات والحين يبغون يتغذوون >>> خوش غذا الساعه 4
راعي الحمله : ويش تبغون غذا ؟
الابو : جيب ليهم دجاج مندي واجد زين
محمد : اي دجاج مندي فن
راعي الباص : اوكي عجل
زينب : يا علي لمتى بتقعد نحارس ؟ ما اضن اوصل سوريا
الام : الحين احنا جواعه خلنا ناكل تالي خلينا نفكر في متى نوصل سوريا
جهز الغذا وتغذوا وخلصوا وكل شي ومشى الباص الساعه 5
زينب : يا علي بعد باقي 4 ساعات ما اقدر اتحمل
مريم : الحين بانام بعد واذا وصلنا محطه نبهوني
زينب : ما تشبعين من النوم
مريم : ويش اسويي هوايتي النوم
الام : نامي يا عمري احسن لش من عوار الراس
مريم : اكيد بانام
محمد يقول الى السواق : ابو حسن باقي جم ونصول سوريا ؟
السواق : باقي تقريبا 5 او 4 ساعات
محمد : يعني ما باقي واجد فن
جا محمد يسوي روحه يبغي امه
وهو يطالع في زينب <<< صدق ما يستحي ولا يخجل
زينب في قلبها : يا علي روووح لا تطالع فيي جذي
الجده تقول الى محمد : انت تطالع فيي لوي ويش مسويه فيك ؟
زينب في قلبها : عاد ما يدور الا يطالع فيش انتين ’’ ويش دخلش في السالفه
الجده وح اقعد مكانك
محمد انحرج وراح مكانه
زينب في قلبها : جدتي كل تفشل الناس حتى محمد فشلته
**************************************
واصل الباص المشي
زينب : اماااه هاكوو اشوووف گبة السيده زينب والمناره مالتها تعلق و تطفي
الام : ايي ويش حلاوة المناره
زينب : الاااااااااي كشخه وصلنا
الجده : الحمد لله يوم وصلنا سالمين
الام : مريم يا مريم قعدي شوفي گبة السيده
مريم وفي عيونها النومه : اييي ايي شفتها
الام : انزين قومي له الحين بننزل
مريم : ايي شفتها
زينب : ههههههههههه تقول لش قومي ننزل قلتين اي شفتها
و مريم في سابع نومه
الام : يووو مي راضيه تقعد
راعي الباص : يلا يا جماعه قوموا نزلووو وصلنا
و قعدوا ينزلوون الاغراض
زينب : اماه مريم كل ما انبه فيها مي راضيه تقعد
الام : ويش هل الحاله الحين چيفه نشيلها هكي نايمه
الجده : ويش عليش منها مشيها حتى لو نايمه
الا م : مريم قومي حبيبتي نزلي وصلنا سوريا
و مريم عمك اصمخ
مشت الام مريم و نزلوا
الابو : ويش فيها مريم ؟
الام : نايمه هذاني ما قادره اجودها
و محمد يطالع في مريم وهو ميت من الضحك
محمد : مريمووو قعدي يا ام النوووم
سمعت مريم صوت محمد وقعدت
مريم : اني اصلا مو نايمه
الابو : زين تسوي يا محمد الضاهر صوتك قعدها ههههههه
مريم : اني اصلا قاعده
زينب : علينا ؟
مريم : اووووه ابويي شوفها
الابو : زينب سكتي عنها . وهاش اخذي هل الشنطه حمليها
زينب : ابويي هي ثقيله
الابو : ثقيله ؟
نط محمد يدخل روحه << سوبر مان
محمد : انا باشيلها اذا ثقيله
الابو : رحم الله والديك شيلها
زينب:
محمد :
قاموا يمشوون عشان يروحون العماره
و مريم تمشي قدام وي محمد وتسولف وياه << صدق ملقوفه
مريم : انت شفتني نايمه ؟
محمد : ايي شفتش
مريم : لويش تطالعني واني نايمه ؟
محمد : كيفي
مريم : انت قوي
محمد: انا قوي ؟ لويش يعني قلتين جذي ؟
مريم : لان عندك عضلات وتحمل شنطه ثقيله
محمد :
مريم : عندك خوات ؟
محمد : ايي وسكتي
مريم : عندك وحده قدي ؟
محمد : ايي هاكي تمشي وي امي وراش شوفيها
مريم : بارووح اتعرف عليها
راحت مريم الملقوووفه الى ايمان اخت محمد
مريم : انتين ويش اسمش ؟
ايمان الدلوووعه : ايمان
مريم : اني اسمي مريم
ايمان :
مريم : امشي تعالي ويايي
ايمان : ماني ابغي امشي مع ماما
مريم : ويييي كيفش
و رجعت مريم تركض الى محمد
مريم : اختك دليعه
محمد: هههههههه اي ادري مو خبر جديد
مريم : وكل تمشي وي امك لويش ؟
محمد: انتين بعد المفروووض مثلها تمشين وي امش
مريم : انت غير نسيبنا ,, عادي
محمد : نسيبكم من وين ؟
مريم : اختي زوجة عمك محمد
محمد : اييي ,, بس بعد لازم تمشين وي امش
مريم : عجل بارووح امشي وي امي
محمد : واخيرا افتكيت منها واجد تهر
زينب تقول الى مريم : ويش قاعده تهرين وي محمد ؟
مريم : ويش يهمش ؟
زينب : قولي لا شدخت بش
مريم : انزين
وقعدت مريم تسولف وي زينب و تقول ليها سوالفها وي محمد
وصلوا العماره
الجده : يا علي ويش قدرني كل يوم اركب هل الدرج الطويل
الام : في لفت هناك مره ثانيه بنركبه
وصلوا الشقه و صارت شقة بيت زينب قبال شقة بيت محمد << شوفوا الصدف
زينب : اني ليي حجره بروحي
مريم : لا والله وحنا وين نروح ؟
الام : جيفه حجره بروحش و هي كلها الشقه حجرتين ؟
زينب : يعني ان شاء الله بتصير ويايي هل البلوى وي البلوى الثانيه
الام : يووو لا تسمعش جدتش
زينب : ماني بكبري بتحمل هذي ويش يقدرني اتحمل هديك بعد
الام : بعد ويش تبينا نسوي ؟
الجده : اهو يلا بنام عشان نقعد الفجر و نروح السيده
زينب : نامي في الصاله
الجده : وي ؟
الام : ههههه امشي نامي عمتي امشي
زينب : الله يعيني عليكم طول هل السفره
مريم : ويي , يلا ولي اني برووح اسبح في الماي البارد
زينب : اني عقبش
نرجع الى بيت محمدوووه
الام : محمد انت و اخوك حسين في حجره و اني وخواتك في حجره
محمد : ان شاء الله اماه
حسين : محمد
محمد : هاا
حسين: اذا كبرت بصير طويل مثلك ؟
محمد : صدق فاضي انا افكر في ويش وانت في ويش رووح فج
حسين :
راح محمد يسبح بالماي البارد << تعرفون ماي سوريا بارد مو مثل هني خخخ
تالي خلص و كشخ وراح على طول الى مكان البليارد
الام : محمد وين بترووح ؟
محمد : اماه جي انا جاهل تسأليني وين بروح و وين بجي ؟
الام : جي بس الجهال يسألونهم ؟
محمد : بارووح العب بليارد
الام : مش استريح على عافيتك تونا واصلين ما مداك تستريح
محمد : اذا جيت بنام
توى طالع من باب الشقه الا مريم طالعه رايحه تشري اجباس وسكريمات وي زنبووو
مريم : بييي طلعت ويانا في مره
محمد : ايي
مريم : بتروح تشتري ؟
محمد ؟؟: ها اييي بروح <<<< يجدب
مريم : ههههه احنا بعد يا القليد
محمد : اشتري ليكم ؟
مريم : زينب يصير يشتري لينا ؟
زينب بصوت خفيف : ما ادري
مريم : ايي اني اشتر ليي
محمد : واختش ما تبغيني اشتر ليها
مريم : بلى ,, انتين ويش تبين ؟
زينب : ما ابغي شي خلاص ودخلت الشقه << مسكينه تستحي
محمد : ويش فيها اختش زعلت ؟
زينب : تدلع ,, اني اشتر ليي عسكريم و جبس
محمد : انزين ,, ما تبغى اختش اشتريي ليها شي
مريم : لا
محمد : عجل هاش جودي بيزاتش
مريم : لوي ؟
محمد : اما اشتري لش انتين و اختش او ما في
مريم : وي في الطقاق ,, اني بروح وياها
راحت مريم الى ختها زينب داخل
مريم :انتين قومي نشتري
زينب : ما بيشتري لش محمد ؟
مريم :يقول يا اما يشتري ليي ولش او مافي
زينب في قلبها : يا علييييييي قمر
مريم : قومي
زينب : يلا
وراحوا يشتروون و في رجعتهم
مريم : بتسابقين وياي ؟
زينب : يوو اتسابق وياش اركض؟
مريم : لا اني اركب اللفت وانتين على الدرج ونشوف من الي يوصل قبل
زينب : ماني اني ابغي اللفت
مريم : اوكي ما عليي جدي جدي اني غالبتنش
زينب : زين
وراحت زينب تركب اللفت و توها بتسكه ما شافت الا واحد يركض ركيض يبغي يدخل
تدرون من ؟ ههههههههه
,,,
,,,
,,,
محمد هههههههه
زينب :
محمد : ابغي اركب
زينب :
محمد يستهبل : بتروحين اي طابق
زينب : 2
محمد : ايي انا بعد بروح 2
زينب :
محمد : هههههه في التلفوون طق سوالف وهني ما تتكلمين
زينب :
وينفتح الباب
وتطلع زينب بسرعه ولا شافت الا في وجهها مريم
مريم : هبله اني غلبتش
زينب : ايي روحي
و زينب خايفه على حدها
دخلت البيت و هي مبين عليها الخوف
الابو : زينب ويش فيش ؟
زينب : ما فيي شي
الابو : انزين يلا امشوو نامووو
مريم : وي توها وقت
الابو : ادري بس ناموا من وقت احسن وريحوا عشان باجر الفجر نروح السيده
زينب : انزين
راحت زينب الحجره الا الجده حضرتها مطفيه الايسي
زينب : خوش خوش بلا ايسي بعد
الجده : اني ما اقدر على الايسي و الوقت حليو ما يحتاج ايسي
زينب : والله عاد اني ما يهمني اني وحده مااقدر انام بدون ايسي واذا عندش اي اعتراض ترى الباب يوسع جمل
الجده : تعال يا ناصر شوف بتك تزمر عليي جني اصغر جهالها
الابو : زينب الوقت حليو عادي بدون ايسي
زينب تصرخ : اني ما يهمني ابغي اانام في ايسي
الابو : سكتي صوتش وصل الى اخر الشارع
وصل صراخ زنبوو الى بيت محمد
ام محمد : يوو الضاهر بيت حجي ناصر يتهاوشون هكو الصراخ مزعزع المكان
فاطمه : ايييي
محمد : اماه روحي شوفي يمكن صاير شي او ميت احد
الام : يوو فال الله ولا فالك ,, بومه ما تنطق بخير
محمد : انتين روحي شوفي الحين
الام : انزين
راحت ام محمد
طق طق طق
ام علي : نعم
ام محمد : شحوالكم ,,وش صاير عسا ما شر سمعنا صراخ خفنا صاير شي
ام علي : هذي زينب المقرووده تصارخ وي جدتها
ام محمد : يعنيي يتهاوشون ؟
ام علي : اي له جنهم قطو وفار
ام محمد : هههههههههههه هذي سالفتي وي عمتي و بتي فاطمه نفس الشي
ام علي : ولا عاد زنبووو ما شفت احد مثلها يحط باله وي جدته
ام محمد : زين عجل يا الله بارووح
ام علي : سامحونا ازعجانكم
ام محمد : هههههه عاادي
وراحت ام محمد البيت
ام علي : زنبووو شفتين هكي جايه ام محمد تقول ويش هل الصراخ
زينب : ها
الام : ايي
اتفشلت زينب ومن كثر الفشيله صاحت
الام : يوو تصيح
زينب : كل من هذي هي اساس البلا لو ماهي هني ويانا جان من زمان نمنا ولا صار هواش
الابو : يلا انطمي ولا تسوين الى امي جدي روحي نامي
الجده :اذا تبغين الايسي شغليه واني بروح انام برا
الابو : شفتين ؟
زينب : خلها هي لان ما تبغي ايسي واني و مريم نبغيه والله
الابو : حسبي الله عليش
تالي قامواسكتوا عن الهواش و راحوا يناموون
زينب في قلبها : الحين محمد ما بيشتهيني لاني فوضويه
نااموا كلهم ويوم ثاني الصبح قعدوا حق صلاة الفجر
و راحوا حرم السيده وتوهم داخلين ما شافوا الا الجده تصارخ صراخ
الجده بصراخ : السلام عليش يا سيدتي ومولاتي
زينب :
مريم :
الام : عمتي امشي ندخل
دخلوا وصلوا و خلصوا تالي بدأ القارىء يقرأ حسيني
و قعدت الجده تصرخ وتصيح
زينب : يا علي جدتي تفشل ويش يسكتها
الام : يلا انطمي تصيح على الحسين تقولين تفشل ,, هذا بدل ما تسمعين قاعده تتحججين
زينب : زين
مريم : زينب اني اتملل هني بتجين ويايي ؟
زينب : وين ؟
مريم : البيت
زينب : اييي
راحوا البيت الا هناك محمد مقعد على الدرج
زينب ما انتبهت له تحسبه صبي ثاني
زينب : يا علي اني جوعانه انشاء الله جابوا الريوووق الحين
مريم : ايي اني بعد
زينب : شفتين جدتي جيفه تصرخ هههههههه
مريم : ايي اتفشلت منها حتى اخت محمد قعدت تضحك
زينب : فشيله
محمد سمعهم و قعد يضحك
داروا اله
زينب :
مريم : هذا انت ؟ من وين طلعت ؟
محمد: من المصباح خخخخخ
مريم : ههه ظريف
محمد : اذا جوعانيين ترى الريووق وصل
مريم : ويش مقعدنك هل الحزه ؟
محمد : الي قعدكم هع
مريم : احنا رايحين نصلي
محمد : و انا بعد صليت وجيت قبلكم
مريم : ااهاا
محمد يضرب نغزه : لويش ما تعطين وجه ؟
مريم : اني ما اعطيك وجه ؟
محمد و هو يطالع في زينب : اييييي مطنشتني
فهمت زينب قصد محمد
زينب :
محمد : اي جذي تصيرين قمر
مريم : هيي انت تتكلم وي من؟
محمد : ها ,, وي الغاليه
مريم : اووه انت اصلا استجنيت امشي زينب نرووح
محمد : ههههههههههه
اراكم في الحلقه القادمه
موضوع: تابع قصه محمد وزينب 
الخميس يناير 29, 2009 1:43 am
